9/11: Eine Szene aus Schwaben

Jedsd hanne zufällich oin droffa, der hod gmoind, er sei au en Verschweerongsglaibiger.

Hoggd er do so emma Schduegerder Kaffee, on wia mer noh ens Gschbräch kommed ons noh om 9/11 goht, secht der off oimol Sacha, die schwer zom jugendfrei ens Hochdaidsche zum Ibersedsa senn; zwoi oder drei Werder hanne sogar tadsächlich scho lang nemme gheerd ghet.

Selbscht dr Hahnabambel, dr Lällabebbel, dr Lohle ond dr guade alde Schdoffel sen vorkomma, onder älle denne Ohbachene, vo dene der vom Leder zoga hod; I hannen en saim Lodajäggle kaum kenna bremsa.

I han noh dengd, I kennd a klois Schbässle macha, wega saim “Kein Stuttgart 21″-Ohschdegger, on hannen gfrogd, obber denn moind, da dr Schduergerder Bohhof middem ganza Glomb genausoschnell en onser heilichs Grondwasser naihagela däd, wia dia Term zammagfloga send, bei dene Ami, dortmols, wenn an Fliager naigrachd.

Des hoddem erschdmol ned so gfalla, weil, wenn’s om den Bohhof goht, kempfed selbschd gsedsde birgerliche Schduergerder middlerweile mid ihrem sonschd so haubdschdäddisch gelassena Humor.

So hodder sich noh bald widder aikriagd on i koine offd Gosch.

Noh semmer off 9/11 zriggkomma.

So hanne so schnell nia dengd, dassen Schduegerder Anti-Bohhefler sich so schnell iber ebbes anders noh meh uffrega koh, wia iber den Scheißbohhof!

Er hod gmoind, on doh derbei ischer noh wirklich volkstemmlich worda, da mer vor ellem amol dia ganze Journalischda zammadreiba sodd, zom se mol genau froga, wanse eigentlich wisset.

“Ja wia witt noh des au macha, on wia willsch’s noh au begrenda, Karle?” (mir händ ons en der Zwischazeid vorgschdelld kett), hannen doh druff a weng verwonderd gfrogd.

“Middera elegdronischa Hirnfessel, ha, wa glaubsch denn du! Begrenda missemer nix, die Maßnahme isch oifach selbschd-evidend erforderlich. Meh geit’s ed zom saga.”

“Ha du bisch mir en scheene Kaschber, on, wer liaferd der denn sotte Denger?”

“Ha wa denksch du? I schaff beim Heckler & Koch, mir händ längschd älles doh, wa needig isch.”

“Em Ernschd?”

“I han jedsd gnueg verzähld. Schdroßaboh on Gaddin warded. Velleicht seha mer ons jo amol widder dohanda. I ben efder doh.”

“Mach’s gued, Karle, mer sieht sich!”

So langsam hannes Gfihl, dass sich alloi scho en der Stuttgarter Altstadt on dromrom schwer ebbes zammabraud.

— Anzeigen —


Tags: , , , , ,

Eine Antwort hinterlassen